Kurti flet për dialogun me Macron, i premton se Europa s’do të ketë kurrë surpriza

10:16, 9 Prill 2020

Mbrëmë, kryeministri në detyrë Albin Kurti kreu një bisedë telefonike me presidentin francez Emmanuel Macron.

Kurti e falënderoi presidentin dhe qeverinë franceze për mbështetjen që i kanë dhënë Franca dhe Bashkimi Europian Kosovës në luftën kundër Covid-19.

Ai e informoi presidentin Macron për masat e marra prej Qeverisë dhe rezultatet duke thënë së beteja kundër Covid-19 mbetet prioritet i drejtpërdrejtë i Qeverisë në detyrë.

Kryeministri në detyrë e falënderoi gjithashtu presidentin Macron për deklaratën e përbashkët franko-gjermane në lidhje me mocionin e mosbesimit në kushtet e tanishme.

Kurti nënvizoi se zbrazëtira e krijuar nga ky mocion nuk mund të mbushet dhe as kriza politike nuk mund të tejkalohet, veçse nëpërmjet zgjedhjeve të reja si e vetmja mënyrë legjitime dhe legale për vënien në jetë të një qeverie të re.

”Çdo përpjekje tjetër për të prodhuar ndryshe ndonjë qeveri në gjendjen aktuale të gjërave do të kalojë përmes udhëve antikushtetuese. Zgjedhjet e reja politike janë të mundshme vetëm pas zgjidhjes së krizës shëndetësore”, deklaroi Kurti.

Presidenti francez shprehu aprovimin për trajtimin e krizës shëndetësore prej qeverisë kosovare.

Më pas, Macron dhe Kurti folën edhe për dialogun dhe angazhimin përkatës për një përgatitje të vërtetë dhe për një pjesëmarrje të vërtetë të palëve në këtë dialog.

Në këtë perspektivë, presidenti Macron shprehu mbështetjen e tij për rifillimin e qarkullimit të mallrave mes Kosovës dhe Serbisë.

Ai premtoi rritjen e rolit të Francës dhe të atij vetë në lehtësimin e dialogut.

Ky do të jetë, sipas tij, edhe synimi i Samitit të Parisit për marrëdhëniet Kosovë-Serbi – samit i organizuar nën drejtimin e Francës dhe Gjermanisë me Bashkimin Europian, sapo të krijohen kushtet e duhura.

Kryeministri në detyrë Kurti premtoi se Europa nuk do të ketë kurrë surpriza, ngaqë qeveria e tij sheh në zbatimin e reciprocitetit zbatimin efektiv edhe të asaj çka përmbahet në marrëveshjet e Brukselit dhe gjithashtu realizimin e premtimeve të bëra para zgjedhësve.

Ai nënvizoi faktin se efektiviteti i dialogut varet nga pjesëmarrja e Europës.

“Europa nuk mund të zëvendësohet nga ndonjë kontinent tjetër dhe as Franca nga ndonjë shtet tjetër. Europa është edhe mjedisi edhe perspektiva e normalizimit të marrëdhënieve mes Kosovës dhe Serbisë”.

Social Media Auto Publish Powered By : XYZScripts.com